1
放白鸽

甲∶小周啊小周，上格号头侬为啥放我白鸽？
乙∶我从来勿养鸽子，啥辰光放侬白鸽？
甲∶上趟侬讲借我三十万，我天天勒屋里等侬送钞票来，侬来过伐？
乙∶我天天勒屋里等侬来拿钞票，侬哪能勿来？
甲∶啊！要死啊，侬哪能勿打电话拨我？
乙∶我现在怕打电话，现在外头人家一眼眼小事体全部录好音等勒好曝光，我哪能吃得消！侬今朝长衫里厢有录音机伐？
甲∶我一家一当只剩一件长衫，哪能还有啥录音机？
乙∶好好好，不过侬一上来就讲我放白鸽，这记结棍噢，啥叫放白鸽？侬懂伐？
甲∶我哪能勿懂？我比侬多吃好几年饭，这点饭加起来压也压杀脱侬来！
乙∶侬是饭桶啊？就算侬多吃格一眼眼饭，就要压杀我？人家借刀杀人，侬结棍噢，借饭杀人！
甲∶你放我一记白鸽，我掼只饭桶敲侬一记，格叫一报还一报，侬勿要讲，格叫大家勿吃亏！
乙∶算侬六月债还得快，侬还要放我一记白鸽？
甲∶勿会，我要放白鸽还会搭侬提前打招呼？告诉侬，放白鸽格人勿会先搭侬讲格！
乙∶当然唠，我格人笨来西格，上趟拨侬放过一记白鸽，钞票用脱仔三十万，到现在还刚刚醒过来！
甲∶啥闲话，我啥辰光放侬白鸽？
乙∶上趟侬勒中信泰富讲，只要侬借我三十万，我带侬到金茂大厦总统套房去住一个月，我听侬一讲，心里激动得勿得了，想想反正你要带我去金茂大厦住总统套房，我先住进去等侬来拿钞票也一样格，啥人晓得我天天等侬，侬又勿来，一个号头一歇歇过脱了，三十天买单，算脱我三十万，人家金茂还八五折优惠，我用脱仔三十万，只当已经借拨侬来，侬格只鸽子值铜钿噢！三十万啊！
甲∶啊？侬一家头住勒金茂用脱三十万算我头上啊？我蹲勒屋里天天打电话拨侬，勿是关机就是不勒服务区，现在这笔铜钿还要算借拨我过来，我作死啊？
乙∶格就叫放白鸽放出事体来，问侬下趟还放伐？
甲∶勿对！勿对！噢，我要搭侬借三十万，为了借三十万，我随口讲一句带侬到金茂大厦总统套房去住一个月，噢，侬自说自话先一家头住进去，又勿喊我一道去，让我等了一个月，我没拿侬一分洋钿，还要我还侬三十万，格算啥个名堂？还讲我放白鸽？
乙∶侬讲了半日天，还是讲勿清爽，老实搭侬讲，侬现在讲格“放白鸽”搭过去格“放白鸽”已经有眼勿一样了。
甲∶啥格勿一样？
乙∶现在讲格“放白鸽”，是指有种人答应侬一桩事体，满口答应，胸口乱拍，样子好了勿得了，头别别转赛过呒没讲过一样，好象放只鸽子到天浪，一眼事体也呒没。格种人现在还有勿少，侬跑到镜子前头马上就捉牢一个！
甲∶我跑到镜子前头马上就捉牢一个！啊！镜子前头有格人就是我啊！侬结棍格噢！
乙∶过去格“放白鸽”花头还蛮透格，好了，老格故事勿讲来，哎，现在还有2009版“放白鸽”来。
甲∶2009版？新鲜格！
乙∶昨日报纸上登过，有个叫甲格人，人是邪气老实。
甲∶像我！
乙∶伊勿管哪能也是个弄堂里500强，钞票数数总也要数好几日！
甲∶像我！
乙∶才是一角头格！
甲∶啊！
乙∶作孽啊格个甲一直寻勿着老婆，倷没伊急煞来，跑到一家婚介所，急匆匆寻着一个女朋友，卖相是好得勿得了，这个女朋友晓得甲是上海市黄浦区老弄堂里500强，对甲好是好来让甲酥脱，一个礼拜就结婚。
甲∶啊！介快！
乙∶一个礼拜就离婚！
甲∶啊！真是勒热昏！
乙∶现在流行“闪婚”，闪电式结婚，闪电式离婚！
甲∶格末格个甲哪能呢？
乙∶新娘子逃脱，格个甲屋里一眼要数好几日格钞票才拨新娘子拿光！
甲∶结棍结棍，格记结棍！
乙∶甲马上从弄堂里500强跌到50000强，一眼也勿敢犟！
甲∶还好我结婚早，否则格记生活我也会吃着格！
乙∶格就叫“放白鸽”，所以结婚勿好急吼吼，勿好凭感觉，勿好听见好闲话骨头轻！
甲∶对对对！特别是像有种人，人家讲带伊到金茂大厦总统套房去住一个月，伊自家鲜格格抢了前八尺，闷声勿响蹲勒金茂用脱三十万！还讲人家“放白鸽”。
乙∶侬勿要讲，我蹲勒金茂天天看电视，还看着仔一条新闻，外地有一个地方，三两日里逃脱仔好几个新娘子，格眼逃脱新娘子的人家人财两空，真是一场集体“放白鸽”。
甲∶新娘子大逃亡！
乙∶最作孽格点男家还有苦讲勿出！
甲∶为啥？
乙∶格几个新娘子才是用钞票买来格，逃脱仔还勿好去报警！
甲∶碰着仔拐卖妇女外加“放白鸽”，真是霉头触到哈尔滨！
乙∶讲到霉头！再讲桩事体拨侬听听，梅兰芳侬认得伐？
甲∶我认得伊格，伊勿认得我！梅兰芳啊，京剧艺术大师，梅派，梅大师，啥人勿晓得？
乙∶梅兰芳“放白鸽”，侬听到过伐？
甲∶勿要瞎讲，当心吃官司噢！梅兰芳会“放白鸽”？
乙∶没知识伐！没知识伐？好勒！告诉侬∶梅兰芳肯定“放白鸽”，今朝勿搭侬讲，下趟再讲！