甲∶小周啊！侬到底有几个朋友叫阿庆啊？
乙∶我自家也弄勿清爽，上号头我勒黄河路吃饭，吃酒吃到味道正好格辰光，碰着仔一个人，走过来搭我打招呼，讲伊叫阿庆，两声兄弟一叫，伊格饭局单子我买脱来。
甲∶我哪能没碰着格种辰光，我搭侬吃饭一直是我买单格，心里“吼狮”啊！
乙∶哎！上趟讲到吼狮，侬晓得“吼狮”两个字哪能写伐？
甲∶“吼狮”、“吼狮”倒是一直讲格，“吼狮”就是“挖塞”，“挖塞”就是“胸闷”，哎！格两个学还从来呒没写过。
乙∶别老了伐？告诉侬，“吼狮”两个字交关人写勿出。只有一个老先生写出来，伊写成吼叫格吼，狮子格狮，意思就是吼叫格狮子。
甲∶格种解释倒是头一趟听见！
乙∶简单点讲，就是狮子心里勿适意，伊“挖塞”，伊“胸闷”，伊又勿像人，好讲出来，又勿会唱咏叹调，伊只好闷闷叫格吼两声，格种样子侬讲阿是“吼狮”？
甲∶道理有眼，我有辰光也是格能介，讲末讲勿出，唱末唱勿出，只好对家主婆哇啦哇啦，也算“吼狮”！
乙∶对啊！所以我勒马路浪看到有种人哇啦哇啦勒吵相骂，从来勿去劝格，我晓得伊拉心里“吼狮”，要让伊哇啦哇啦叫到没劲，“吼狮”发脱，马上太平。
甲∶其实老底子讲“吼狮”，只指女人讲，有句成语叫“河东狮吼”侬听到过伐？
乙∶听到过格，上趟有只电视剧专讲河东狮吼，讲格家人家女人凶来，吵起来就象狮子叫，男人吓煞！
甲∶女人凶起来象只吼叫格狮子，是因为伊拉心里“吼狮”。现在勿论男女，只要心里勿适意，才叫“吼狮”。
乙∶对啊！所以我勒马路浪看到有种人哇啦哇啦勒吵相骂，从来勿去劝格，我晓得伊拉心里“吼狮”，要让伊哇啦哇啦叫到没劲，“吼狮”发脱，马上太平。
甲∶唉！可惜心里“吼狮”格人太多，迸勿牢，才要发出来。
乙∶现在讲和谐社会，心里“吼狮”最好寻心理医生谈谈。
甲∶寻心理医生谈谈要付钞票。
乙∶格末向我学习，搭家主婆谈谈。
甲∶我谈过一趟，再也勿敢谈。
乙∶为啥？
甲∶伊是心理医生，收费收习惯了，搭我算客气，退拨我三十元，算八五折优惠！
乙∶啊！
甲∶（扮爷叔）老婆啊！今朝我一看电视里格舞林大会，心里“吼狮”得勿得了！
乙∶（扮妻子）为啥啦！
甲∶我爷叔平常经常百乐门跑跑，仙乐斯跳跳，格趟人家办舞林大会，闹猛得一天世界，从上海版做到全国版，我也想去舞林大会露一把。
乙∶侬好去舞林大会啊！勿要搭我现世来！
甲∶啥人晓得舞林大会人家老客气搭我讲，只有老娘舅里格阿庆有资格，对勿起了！侬讲伊心里“吼狮”伐？
乙∶侬也勿要“吼狮”，侬就做做爷叔末好来，让人家老娘舅里格阿庆去跳舞有啥勿好啦！
甲∶我爷叔搭老娘舅里格阿庆老早勿惬意来，我勒想，阿拉两个人上去一PK，肯定闹猛！
乙∶我搭侬讲，人家舞林大会勿让侬搭老娘舅里格阿庆PK，肯定有道理格。
甲∶哼！伊拉勿请我，我就自家办只舞林大会，外加还是国际版。摆勒百姓戏台跳，肯定也有交关人来参加，特别要请老娘舅里格阿庆来！我搭伊一PK，收视率肯定升到13点。
乙∶崭是崭格，侬自家办舞林大会，钞票有伐？
甲∶钞票侬去弄，我一家一当才勒侬手里！
乙∶格哪能来事，侬格眼钞票哪能够，算了，勿要“吼狮”来，快去背侬爷叔格台词吧！
甲∶勿来事，格趟我爷叔搭老娘舅里格阿庆好好叫要弄一弄，人家舞林大会啥个十进三，我搭格个阿庆要二进一，勿要太刺激噢！
乙∶我叫侬爷叔来，勿要硬出头来，做好本职工作吧！
甲∶哎！侬哪能勿帮我，侬是我老婆啊？侬看到我“吼狮”勿帮我！我真是更加“吼狮” 来！
乙∶侬“吼狮”我劝劝侬还勿好啊！
甲∶勿好，格趟我“吼狮”得结棍来，啥人也勿要劝我，啥人劝我，我搭啥人过勿去！
乙∶格末我也搭侬讲，勿要当仔只有侬“吼狮”，我本来勿“吼狮”，侬搭我寻着仔“吼狮”，我现在开始也“吼狮”来，侬也晓得我“吼狮”起来啥样子，阿要再试试？
甲∶啊！我格叫寻“吼狮”啊！好好好！我晓得侬“吼狮”起来啥样子。
乙∶哼！本来侬蛮太平，日脚蛮好过，倷没侬太“太平”勒也勿太平，要弄眼事体出来，格就叫寻“吼狮”！
甲∶好了好了，我勿敢“吼狮”了，我听侬闲话，（唱越剧）千错万错是我错……
乙∶所以啊，做人，心里一定要多一点阳光，少一点“吼狮”，更加勿要去寻“吼狮”！
甲∶格末我心里“吼狮”哪能办？
乙∶寻我啊，我是侬家主婆，是最好格心理医生。倷侬还“吼狮”伐？
甲∶不敢“吼狮”了，我见侬是一帖药，最最服帖。
乙∶真格？
甲∶真格！
乙∶好了，去背台词吧！
甲∶噢！谢谢老婆大人！我去了！
乙∶哎！回来！
甲∶老婆大人还有什么吩咐？
乙∶心理咨询费还没有交吧？
甲∶啊！